عزاء واجب - للشاعر المبدع كاشف عبدالجواد

عزاء واجب ...
ف أحلامنا اللي حلمناها
وضحكة زمان ضحكناها
ونخوة صحيح كانت بينا
نسيتنا .. نسيناها .. الدوام
لله ...
عزاء واجب ...
في مين يقول للظلم ياظالم
يموت عالم .. وتعيش رقاصة
حتى لو م بإيدها .. صاجات
تحيي الليالي وتدعي لزمرة
البهوات ...


عزاء واجب .. فيا أنا .. أنا
الصعلوك .. أنا الصايع .. أنا
الضايع أنا المغلوب على أمري
يقولوا اصبر اجيب صبرين
على صبري .. وأحاول أعيش
بالكام معييش الي ويايا ...

عزاء واجب ...
فيا أنا وأنا لسه مبينكم حي
صفر اليدين وخبتي .. ما
التقيتلها زي ...
وعلية القوم متمتعين ...
متقمعين في بدلهم .. أسياد
أبونا مافي غيرهم ولا بدالهم
مابقتش عارف أفرق مابين
الساعي وبين رئس الحي

عزاء واجب ...
فعيونكم اللي عماها النور
ولسانكم الي اتلوى من كتر
قول الزور
فإيديكم إللي إتعودت تاخد
وما تديش ولا عدتم عاملين
حساب لا لجد ولا لتهويش

عزاء واجب ...
فعدالة معووجة إبن البيه يبقى
بيه وابني أنا له سكة معووجة
من حفرة لنقره يتشنكل يقوم
تكعبله طوبه .. وان بس قال
الأي تكون وقعة أبوه سودة

عزاء واجب وعزانا مش عالقبر
عزانا على كل باب سوق .. أسعار
مولعة نار .. وعلى عتبة البقال
نواحنا كان حاضر .. أقله لاخر
الشهر ابدا ما قال حاضر .....
وانا اللي بقيت منيش عارف
اعيش بالكام معييش اللي ويايا

والعزاااء واااجب ...

بقلمي ★ كاشف عبدالجواد
********************************
""""""""""""""""""""""""""""""""""""""""""""""""""""""""""""""
( المقصود بعدالة معووجة أي العدالة الإجتماعية وهي مسؤلية الحكومة لا القضاء ... لا نتعرض للفضاء من قريب أو من بعيد لذا وجب التنويه ...
********************************************
Kashef. 29 - 6 - 2017.