انسى وعيش - للشاعرة الكبيرة ا. سامية سليمان

إنسي وعيش
***
لو ح تحس
ف مرّة بقهرك
إفرد ضهرك
واعزم أمرك
واطلق مُهرك
ما توطيش

لو راح تعتر
أو تتكسّر
أو شيء أكتر
لم جروحك
لملم روحك
جوّه الريش

زمنك آلمك
دوس علي ألمك
وامسك قلمك
ولا تبكيش

حلمك راح
نام وارتاح
واحلم غيره
ف أرض براح
برّه الشيش

واجه نَفْسَك
طوّل نََفَسَك
قول ما ف نِفْسَك
ما تخبيش

إكسر خوفك
لحدود شوفك
فوت ف الريح
لو ح تخافها
ما تعديش

وان جت فرصة
إمسك فيها
إوعي تفوتك
وتعدّيها
أحسن تندم
تاني عليها
لو ما تجيش

من أحزانك
أّلّف نكتة
ونكتة ونكتة
واضحك والعب
يك وشيش

خد م الدنيا
أحلي مافيها
وارمي همومها
ومُر ما فيها
ماتخلّيش

لو ح تعيش
دايما مهموم
أو مهزوم
أو مغموم
تبقي حياتك
زي مماتك
إنسي وعيش .
...
أم الشعراء
سامية سليمان محمد