قهوة مصرية - للشاعر الكبير ا. مصطفى العيادي

من زمان ..
قهوتنا مليانه ..
زباين قاعدة .. نايمة .. نعسانه ..
في ايدين صاحبنا .. شنطة ..
مكتوب عليها .. مصر أحلى ..
شايللي فيها نيشان .. قديم ..
وساعة خربانة !!
حدوة حصان ..
محكوكة .. عدمانة !!
جزمة جلاسيه ..
لمعتها جربانة !!
بدلة .. أربع زراير .. قديمة
ياقة مزيتة .. ألوانها كحيانة ..
أوراق نصيب .. صفرا مصدية ..
بتقوووول ....
يا دنيا .. ليه انتي تعبانة !!
.........
التاني قاعد ..
في ايده ..
صورة بهتانة ..
يبص فيها .. يقول :
يا عيني محلاها ..
ماسك بإيده .. وردة دبلانة ..
خطيبتي .. عمري منساها ..
يا ناس..
ليه أمي شايلاها !؟
م الغيرة ماتت !!
لقيتها .. سايباها !!
يااخينا ..
دي .. نعيمة شخلع ..
وأمي عارفاها !!
شاااي تقييل .. ع النوتة !!
الله الله على سومة .. ومغناها !!
وناس لسة صاحية !!
م القهوة قرفانة !!!!!!
...

( مصطفى العيادي)